Jesaja 52
13 Kiek, mien knecht zel der greep op kriegen,
aal meer in reken kommen, haile hoog verheven wezen.
14 Wat wazzen lu verbalderd,
tamtaaierd as e was en schonden,
mor naauw meer n mensk,
15 t verstand van volken staait ter bie stil
en keunenks stoan sproakeloos.
Ze zain wat heur nait verteld was,
besevven doar ze niks van vernomen haren.
|
Jesaja 53
01Wèl zol leuven wat wie heurd hebben?
Wèl kreeg oog veur macht van de HEER?
02Hai schoot op as n luk stekje,
as n worrel in dreuge grond.
Aanzain het e nait,
gain pronk en pracht,
t aanzain nait weerd.
Van zien veurkommen ston gainent versteld.
03Niks in reken, meden deur mensken,
n man dij wait van zaikte en verdrait,
aankeken mit hörns van ogen,
doar wie op deelzagen en niks in reken haren.
04En toch: ons zaiktes het e overnomen,
ons lieden droagen.
n Aansloagen man veur ons,
deur God vernederd en tamtaaierd.
05Om ons wandoaden is hai deurboord.
Om ons minne doaden is hai verdizzelwaaierd.
Hai kreeg de straf - wie de vree,
hai kreeg strips - wie beterschop.
06As schoapen haar we ons verlopen,
wie gingen elk ons weegs.
Mor de HEER luit schuld van ons
deelkommen op hom.
07Rinkjevield wer e, mor hai gaf hom deel,
dee mond nait open,
net as n schoap noar slachtbaank tou.
As n ooi, stom onder handen van schoapscheerders,
dee e mond nait open.
08Oppakt wer e en veroordaild: t kostte hom de dood.
Wèl ston stil bie zien löt,
ofsneden as e wer oet t laand van leventegen,
doodsloagen om rebulie van mien volk?
09Men dee hom n graf bie misdoadegers,
n grafstee maank rieke lu.
Toch haar e niks verkeerds doan,
nooit n onwoar woord zegd.
10 t Was de HEER zien wil hom te verdizzelwaaiern,
hom mit zaiktes te sloagen.
Toch het e zokzulm geven as ovver veur t kwoad.
Doarom mag e zien kindskinder zain en laank in leven blieven.
Joa, deur zien haand zel gruien en bluien aal wat de HEER wil.
11 Noa aal zien lasten en lieden
krigt hai nou t licht te zain,
vol wieshaid zel e wezen.
Mien knecht zel zain loaten hou rechtveerdeg hai is veur altmoal:
hai pakt heur zunden op nek.
12 Hai krigt zien paart, as aal dij grode lu,
en dailt t roofgoud mit dij t te zeggen hebben.
Aan dood het e zok over geven,
bie misdoadegers wer e rekend.
Mor t kwoad van n bult lu het hai op zok nomen,
tussenbaaident kwam e veur misdoadegers.
|